ഖത്തര്‍ സ്റ്റേഡിയത്തില്‍ ആര്‍എസ്എസ്സിന്‍റെ കൂറ്റന്‍ കൊവിഡ് ഹോസ്പിറ്റല്‍! യാഥാര്‍ഥ്യം എന്ത്?

ഖത്തര്‍ സ്റ്റേഡിയത്തില്‍ ആര്‍എസ്എസ്സിന്‍റെ കൂറ്റന്‍ കൊവിഡ് ഹോസ്പിറ്റല്‍! യാഥാര്‍ഥ്യം എന്ത്?


  •  

ദോഹ: കൊവിഡുമായി ബന്ധപ്പെട്ട് സോഷ്യല്‍ മീഡിയയിലൂടെ വരുന്ന വ്യാജ പ്രചാരണങ്ങള്‍ക്ക് വൈറസിനേക്കാള്‍ വേഗമാണ്. ഇതുപോലൊരു തെറ്റായ വാര്‍ത്തയാണ് മധ്യപ്രദേശിലെ ഇന്‍ഡോറിലെ കൊവിഡ് ആശുപത്രിയുമായി ബന്ധപ്പെട്ട് ആര്‍എസ്എസ്സുകാര്‍ സാമൂഹ്യ മാധ്യമങ്ങളിലൂടെ പ്രചരിപ്പിച്ചത്. 45 ഏക്കറില്‍ 6000 ബെഡുകളുള്ള ഏറ്റവും വലിയ രണ്ടാമത്തെ കൊവിഡ് ആശുപത്രി ആര്‍എസ്എസ് നിര്‍മിച്ചു എന്ന രീതിയിലായിരുന്നു പ്രചാരണം. ശ്വാസതടസ്സം നേരിടുന്ന രോഗികള്‍ക്കായി ഇവിടെ നാല് ഓക്സിജന്‍ പ്ലാന്റുകളും നിര്‍മിച്ചിട്ടുണ്ട് എന്നും വാര്‍ത്തയില്‍ പറഞ്ഞിരുന്നു.

വാട്സ്ആപ്പ് വഴിയാണ് പ്രധാനമായും ഇതുമായി ബന്ധപ്പെട്ട പ്രചാരണങ്ങള്‍ നടക്കുന്നത്. ഒരു പടുകൂറ്റന്‍ കെട്ടിടത്തിന്റെ ആകാശ ദൃശ്യവും ഇതോടൊപ്പം നല്‍കിയിരുന്നു. എന്നാല്‍ ഇതുമായി ബന്ധപ്പെട്ട് വാര്‍ത്താ മാധ്യമങ്ങള്‍ നടത്തിയ അന്വേഷണത്തിലാണ് പ്രചാരണം വ്യാജമാണെന്ന് വ്യക്തമായത്. ഏറ്റവും രസകരമായ കാര്യം 2022ലെ ഫുട്ബോള്‍ ലോകകപ്പിനായി ഖത്തറിലെ അല്‍ഖോറില്‍ നിര്‍മിച്ച അല്‍ബൈത്ത് സ്റ്റേഡിയത്തിന്റെ ചിത്രമാണ് ആശുപത്രിയെന്ന പേരില്‍ പ്രചരിക്കുന്നത് എന്നതാണ്. 60,000 കാണികള്‍ക്ക് ഇരിക്കാന്‍ സാധിക്കുന്ന കൂറ്റന്‍ സ്റ്റേഡിയമാണ് അല്‍ബൈത്ത്.

അതേസമയം, ഇന്‍ഡോറിലെ രാധാ സവോമി സത്സംഗ് ബിയാസ് ഗ്രൗണ്ടില്‍ ഒരു കൊവിഡ് ആശുപത്രി നിലവിലുണ്ടെന്ന് മാധ്യമങ്ങളുടെ അന്വേഷണത്തില്‍ ബോധ്യമായി. എന്നാല്‍ അഹല്യ കൊവിഡ് കെയര്‍ സെന്റര്‍ എന്ന ഈ ആശുപത്രി നിര്‍മിച്ചത് ആര്‍എസ്എസ് അല്ല. മധ്യപ്രദേശ് സര്‍ക്കാറിന്റെ മേല്‍നോട്ടത്തില്‍ വ്യവസായികളുടെ സഹായത്തോടെയാണ് ആശുപത്രി സജ്ജീകരിച്ചത്. ഇവിടെയാവട്ടെ നിലവില്‍ 600 ബെഡുകള്‍ മാത്രമാണുള്ളത്. ഭാവിയില്‍ 6000 ബെഡുകള്‍ വരെ സജ്ജമാക്കാനുള്ള സൗകര്യം ഇവിടെയുണ്ട്.